ڈگری کالج حاجن میں شاندار تقریب کا انعقاد
آج گورنمنٹ ڈگری کالج حاجن میں حلقہ ادب سوناواری حاجن نے کمراز کی ہمہ جہت شخصیت مرحوم محمد احسن احسن کی یاد میں ایک پُروقار تقریب کا انعقاد کیا۔ تقریب کی صدارت ڈگری کالج حاجن کے پرنسپل پروفیسر پیر ظہوراحمد نے کی جبکہ اُن کے ہمراہ ایوان میں ادبی مرکز کمراز کے نائب صدر سیداختر منصور ، حلقہ ادب کےسرپرست سنااللہ نیاز اور محمد احسن احسن کے فرزند احسان الحق موجود رہے۔
تقریب کا آغاز رمیض احمد نے تلاوتِ کلام پاک سے کیا جس کے بعد شبیر مقبول نے نعت شریف پیش کیا۔
تقریب کی پہلی نشست ایک طرحی مشاعرہ تھا جس میں حلقہ ادب کے ساتھ وابستہ کئی شعراء نے محمد احسناحسن کے مصرعہ اپنا طرحی کلام پیش کیا۔ اس تقریب کی نظامت کے فرائض مہتاب منظور نے انجام دئے۔
تقریب کی دوسری نشست کے آغاز میں شاکر شفیع نے کلیدی خطبہ پیش کیا۔ انہوں نے احسن صاحب کو ایک ہمہ جہت شخصیت قرار دے کر انہیں ایک مخلص اور دیانتدار انسان قرار دیا۔ اس نشست میں ڈاکٹر فردوس احمد اور شہباز ہاکباری نے احسن صاحب کی خدمات اور اُن کے فنی محاسن پر مقالے پیش کئے۔
اپنے صدارتی خطبے میں صدر ایوان پرنسپل پروفیسر ظہور صاحب نے حلقہ ادب کو کشمیر کی سب سے بڑی ادبی اور لسانی تنظیم قرار دیا۔ پروگرام کے آخر پر شیخ غلام محمد نے تحریکِ شکرانہ پیش کیا۔ تقریب کی نظامت کے فرائض ڈاکٹر ریاض الحسن نے انجام دیں ۔ اس تقریب میں حلقہ ادب کے ممبران کے علاوہ ادبی مرکز کمراز کے کئی عہدیداروں ، کالج طلباء ،ادیبوں ، قلمکاروں اور شاعروں نے شرکت کی۔
